Lo blòg de la Noemia autrament dich Dam(!)giner

Calendièr festiu

2009-05-10T15:48:00.007+02:00

Coma las vacanças arriban lèu-lèu, ai decidit de vos prepausar un calendièr de las fèstas de vilatges del Sud Avairon.
N'ai ja parlat, mas aquí trobarètz las datas precisas.

JUNH:
- 19/20/21 de junh: Sant Africa, aquí me trobarètz a la beguda per vos servir...

JULHET:
- 3/4/5 de julhet: Vabras l'abadiá
- 10/11/12 de julhet: Lauras e Molin-Mage
- 17/18/19 de julhet: Lo Truèlh

AGOST:
- 31/01/02 de julhet e agost: Mones
- 7/8/9 d'agost: Falhet e Tornamira
- 14/15/16 d'agost: Belmont sus Rance
- 21/22/23 d'agost: Sant Sever e Sante Eulalia
- 28/29/30 d'agost: Verièras

SETEMBRE
- 4/5/6 de setembre: Reborguil
- 18/19/20 de setembre: Camarès

Contunharai a emplenar aquel article quand aurai mai d'informacions.
Bon estiu en Avairon!

Lo Solelh de Marcilhac

2009-03-28T21:52:00.006+01:00

Vos voliái detalhar la recèpta del Solelh de Marcilhac, mas ai trobat sus internet una videò qu'o fa fòrça plan.
Alara vos vau contar son istòria enfin, la qu'ai trapada.
L'origina del Solelh es ligada al vin, puèi que lo mai pichòt AOC de França es en Avairon e mai precisament dins lo valon de Marcilhac.
Cada diluns de Pentacosta a Marcilhac se celèbra la Sant Borron, fèsta ont la tradicion es de benesir los borrons de la vinha justament. E dins aquel temps per sovenir, totes los ancians menavan d'aquela jornada de vin e de Solelh.
Lo Solelh es unenc en Avairon. N'existís mai d'unas variantas, mas a conservat doas especificitats que lor foguèron donadas pels ancians:
una estèla al mitan que se sòna las aurelhas e sa descopa sul contorn que se sona los artelhs.
Vaquí la vidèo e lo siti ont ai trapat aquelas entresenhas (se pòt quitament comprar de Solelh per internet!).

Mercé Clara per aquela recèpta.

12ème Comité

2009-03-27T14:12:00.011+01:00

Un autre grop sant african: 12ème Comité.
Lo rap es vertadièrament pas mon univèrs musical mas bon an sortit un clip "Viens" e se fau pas de publicitat per de Sant Africans ne farai per degun.
Tot çò que pòdi dire es que son sovent sus las scènas avaironesas.
Los ai pogut veire mai d'un còp e bon emai s'es pas la musica qu'aimi lo mai es totjorn simpatic de los ausir cantar (o puslèu rapar...).
Puèi lo siti ont se faguèt lo clip es tanben polit. Ne cal parlar un pauqueton...
Es lo castèl de Sant Izari (encara un polit vilatge avaironés) ont se debanarà en julhet un festenal de blues.
Puèi coma tot vilatge d'Avairon que se respècta, sa fèsta se debanarà la tresena dimenjada d'agost.
Enfin avètz aquí lo myspace del 12ème Comité.
E aquí un pauc d'entresenhas sus Sant Izari e son castèl.

Brick a Drac

2009-03-09T21:07:00.005+01:00

Vau contunhar amb de musica e un grop avaironés que se sona Brick a Drac.
Venguèt a Sant af' un divendres, una serada organisada per l'associacion Cap l'Òc. Vaquí una pichòta presentacion del grop.
Après aver fach un pacte amb lo Drac, lo grop trèva vòstras encontradas amb sos engranatges neo-Occitans-Celtics. Marida en defòra del temps sas inspiracions trad menadas per la fosiga Vièla a la ritmica rock, festiva e tribala. D'aquel motor d'explosion, lo Brick a Drac Turbòfolk d'energia renovelabla se'n va vos enfuòcar sus sas melodias emmascantas. Lo grop s'afortís d'un biais convencent per una musica totjorn mai elaborada virada cap a son temps.
A bòrd del Brick a Drac, embarcaretz per un viatge vers l'imaginari occitan ont vièlhas legendas e vièlhas revòltas venon d'unes còps fòrça actualas.
Ont la modernitat es una evolucion de la tradicion, Brick a Drac s'afirmís còs e arma dins la musica trad d'uèi.
Jògan sovent dins Avairon, los poiretz veire per las Estivadas de Rodès aqueste estiu.
E per acabar l'article, apondi que i a de Sant Africans dins lo grop, dont una liceana de mon ancian licèu.

Lou Dàvi

2009-02-25T18:44:00.009+01:00

Per manca d'imaginacion ai demandat l'ajuda d'amics per trapar d'idèias d'article. A l'ora d'ara ne me'n cal trapar sièis.
Vau començar amb un article sus Lou Dàvi que me faguèt Clara. Ausiguèt parlar de Lou Dàvi quand venguèt a l'universitat Champolion d'Albi lo 20 de novembre de 2008, ont Clara es estudianta (en drech, mas aquò o cal pas dire).

D'eslam, una guitarra e una votz cauda e viva: vaquí cossí podriam descriure la musica del jove Lou Dàvi. Mas seriá alara sens oblidar l'essencial, aquel pichòt mai que lo rend unic: aquel jove poèta canta en occitan.

Aqueste trobador dels temps modèrnes comencèt sa carrièra en 2004, a la seguida de doas vertadièras descobèrtas que crean son bonur uèi: l'occitan e la scèna eslam. A partir d'aquí, encadena lo cant, lo teatre, la musica e multiplica las experiénças a la ràdio. Es en efièch vertadièrament dins son element. E aquò se sentís plan sus scèna: son talent li permet même d'èsser presentat dins un article publicat dins "La Despacha". Dins sos tèxtes d'eslam, nòstre òme del capèl posa l'inspiracion de sas paraulas dins la sabiesa que ten de sa cultura, i mesclant umor e poësia. Captiva son public pas solament gràcias a aquò, mas va dusca a l'ipnotizar per sa presència carismatica, son sorire embelinaire e sens del ritme. Puèi sa musica ven una vertadièra addiccion quand descobrissèm qual es realament en parlant amb el après sa performança. Alara esitètz pas, se sabètz pas qué far de vòstra serada del 15 de mai, l'anatz veire a Tolosa! E per lo mai sceptics podètz ja l'escotar sus myspace.

Merce Clara per ton ajuda e coratge per tas fichas d'arrèst, tas dissertas e cases practics... .

Bona annada a totes!

2009-01-03T15:03:00.005+01:00

Vos desiri una bona annada e tot lo blablabla costumièr!!
Per la pena meti una fotò del novel an!
Per los que me coinescan pas, a vòstra idèia qual soi?

Nadal en Alsàcia!

2009-01-03T14:38:00.008+01:00

Vaquí qualques fotòs dels mercats de Nadal en Alsàcia que faguèri dins lo freg.
Las fotòs son pas tip-tòp, mas ai d'imatges plen los uèlhs. Era lo primièr còp que fasiái Nadal amb la familha d'Alsàcia mas me'n remenbrarai. Aval an lo 26 de decembre de congèt perque es la Sant Esteve, aquò te fa tres jorns de repais de familha doncas tres jorns a s'apitarrar de longa. Pffiou!!

De nèu!!!

2008-12-14T21:42:00.006+01:00

Uèi a nevat. Aquò suspren, subretot quand es pas previst. E qu'a doas oras del matin res t'indica que lo matin te va desrevelhar amb de nèu d'en pertot e una rota pas de bon practicar. Seriái plan demorada aval se foguèron pas los examens deman vos o disi...
Vaquí es tot! [desencusatz me per la qualitat de las fotòs]

Bilan

2008-12-02T18:29:00.005+01:00

Ai tornat trapar las consignas de trabalh del semèstre par Melania. E ne vau profiechar per far lo bilan de çò qu'ai fach:
- Crear un blòg ----> aquò's fach: http://damginer.blogspot.com
- Escriure un article de presentacion ----> aquò's fach: veire "Dam(!)giner" qu'es aquò??
- Escriure un article per setmana ----> cresi plan qu'es fach, compti aqueste e ne farai un autre per la setmana que ven.
- Article de 15 linhas min. ----> aquò's mai o mens fach
- Variar los tèmas ----> vos ai parlat de St Af', d'Avairon (sas fèstas e de son climat), de Caunàs, de sovenirs e de ma vida quand aviái pas cap d'idèias (una causa qu'aborrissi de far). Doncas cresi qu'es fach.
- Metre d'imatges, de videòs ... ----> n'ai mes.
Alara vos prometi pas de contunhar lo blòg, un quicòm de segur serà pas setmanièr, veirai segon mon enveja. A despart se Melania a l'idèia de nos donar lo blòg coma trabalh pel segond semèstre...
Ten! 15 linhas...
Cric, crac, lo meu article es acabat.

Lo ressopet

2008-11-23T22:27:00.004+01:00

Sèm a un mes de las vacanças, e cada an lo meteis subjècte tòrna: la question del ressopet.
Mas aquesta annada es un pauc differenta.
Vos expliqui perqué. A cada còp avèm de dificultats per trobar lo luòc.
Mas aqueste còp es un autre problema que se pausa: la causida del luòc. Anatz saupre perqué mas n'avèm mai d'unes e son totes plan coma cal.
Alara avèm un mes per nos decidir...
Sabi pas se los concernits legisson lo blòg mas s'es lo cas donatz vòstres avises sus la question.
Vos meti las causidas qu'avèm pel moment:
- Tolosa, en cò de Nono e de Max
- Montpelhièr, en cò meu
- Albi, en cò de Bapt,
- Vias, en cò de Pato,
- e enfin Laguiòla s'es encara possible de reservar.
Alara nèu (se n'i a), mar, granda o mejana vila, metrò o tram caldrà causir...

Lo meu aniversari!

2008-11-03T11:51:00.010+01:00

E òc Damginer festegèt son aniversari!
Un an de mai! Sabi que 19 es pas la mòrt mas me faguèt un quicòm.
Me diretz per de qué? Fa pas res, es pas coma 20 ans.
Justament èri plan ieu amb mos 18 ans, los esperavi amb impaciéncia per passar lo permés mas es tot. Es segur qu'un an de mai càmbia pas grand causa o vos acòrdi, mas es tot lo demai que va amb el.
Èri plan ieu dins ma vilòta, ai pas res demandat e ara me tròbi dins una vilassa. Alara los qu'aiman las vilas son coma de peisses dins l'aiga. Mas per ieu qu'aimi pas tròp aquò e qu'ai pas l'arma de la ciutadina per excelléncia tot çò qu'espèri es lo divendres per passar lo pas de l'escaleta e lo Larzac.
Per tornar al meu aniversari, lo festegèri dissabte passat amb los ex Joan-Jauresians. Repais costumièr en cò meu, degustacion de pastís al chocolat acompanhat de sa "chantilly" e seguida de la serada a la fèsta de Camarès.
E òc emai un primièr de Novembre trobatz encara de fèstas dins Avairon!
Bon es dins la sala de las fèstas, fa fòrça mens caud mas i podètz passar un bon moment dusca a pas d'ora e es l'ocasion de tornar veire los acostumats.
Vos meti en fotò lo meu polit Bromelia qu'aguèri coma present. A creire qu'aguèron pietat del meu estudiò.

Las annadas 90'...

2008-11-02T20:10:00.010+01:00

Uèi ai decidit de vos far profiechar de mon costat nhanhà, mainatge e subretot nostalgic.
De dissabtes que i a nos pren l'enveja d'agachar de generics d'emission TV o de dessenhs animats qu'an breçat nòstra enfància.
Fa benlèu fòrça nhannà (subretot a nòstre atge)mas nos fa passar un bon moment de rire.
Entre un que vos canta de per còr lo generic de Denver lo darrièr dinosaure, l'autre lo de Bona nuèch los pichons, o encara Paire vibre &Cie...
En mai d'aquò trobatz un fum de videòs sus "Youtube" o "Dailymotion" per alimentar lo saut dins lo passat.
A creire que n'i a qu'an pas qu'aquò de faire.
Vos dòni un apercebut de çò que podètz trobar coma videòs.
Los Bisonors:

E los Minikeums (vos o prometi es la darrièra):

Ara retorn al present e sa realitat.

Un dissabte plan agradiu!

2008-10-28T18:53:00.008+01:00

Tot comença per una tièra de conferéncias ont ai capitat d'i menar l'estudiant en drech fòrça ocupat per son "triptic dissertat" coma o aima dire.
Seguís per una o doas oras en cò del futur infirmièr que me serviguèt de subjècte d'estudi de sociolinguistica.
Macarèl que l'ora passa lèu! Soi en retard es segur.... "Alò! Òc o sabi, arribi dins mens de cinc minutas partissi sul pic d'en cò meu. A totara!"
Retrobalha sul parcatge Fòch. Cossí o coneissètz pas? Per nosautres es un luòc incontornable de la dimenjada, anatz saupre perqué... Bon a pas res d'excepcional mas es nòstre luòc de rendètz vos dempuèi un moment ara e se ne vos pren l'enveja de lo cambiar.... es alara lo destrantalhament de tota una institucion e de la còla tota.
Seguida de la serada a "La frita encantada" (encara un luòc costumièr quand avèm pas d'ostal e subretot de cosina de liura) ont amb nosautres la carta de fidelitat es emplenada en dos sers. Puèi direccion la sala de las fèstas, pichòt tampon per dintrar a gratis (de que cresètz sèm Sant-africans!), crompa de pega-solets per las veituras e nos vaquí a agachar la balèti tot en esperant Mauresca.
Encara una bona serada, de descobèrtas puèi que los aviái pas jamai vistes en concèrt (e èra un vertadièr plaser, de tornar faire!), e subretot una capitada puèi que capitèt de menar lo parisenc al collòqui e un momenton al balèti...

Las originas...

2008-10-11T13:25:00.011+02:00

Dempuèi la debuta vos fau cagar (o pas) amb Avairon vos disent qu'es lo meu país.
Mas vos devi la vertat... e òc Dam(!)giner es una messorguièra.
En fach, soi pas vertadièrament avaironesa (enfin sonque dempuèi 13 ans) puèi que vos o confessi soi erautesa.
D'un polit pichòt masatge nommat Caunàs a costat del Bosquet d'Òrb.
D'unes o savián ja e vos pòdi dire que se son pas gardats de me far los diverses jòcs de mots que se pòdon far...
Me rapèli plan que quand arribèri en Avairon, èra a Vabres (vilatge a la fèsta estivala mitica), passèri a l'escòla per un filheta mal ensenhada puèi que disiái totjorn "Caunàs", mas la paura professora podiá pas endevinhar que respondiái sonque a mos camaradas quand me demandavan d'ont veniái...
Totjorn dins las anecdòtas, aquò explica lo fach qu'a las fèstas de vilatges quand es lo moment cançon de "la garrèla", soi la sola a me far remarcar quand lo tipe ditz :" Es per se confessar al curat de Conàs...". E mai s'es pas lo meteis, me'n bati!!!

"Avairon mon país"

2008-10-06T11:29:00.007+02:00

Avairon encara e encara...
Fa qualques jorns ja que de personas me fan remarcar que fa freg lo matin a Montpelhièr, bon ieu trapi pas mas enfin o vòli plan creire pels qu'an pas vist qu'aquò.
Enfin a son que una ora e mièja d'aquí (aquò depend d'ont anatz mas per ieu es a dire Sant-Africa me cal aquel temps), trobatz un autre climat.
D'unes me diràn qu'es "lo pòl nòrd", mas non es son que un climat autre que lo que coneissètz. E mai se lo matin lo païsatge es gelat, la montanha es palaficada pel freg de la nuèch. Se quand sortissètz lo vèspre avètz a l'ora d'ara besonh del mantèl, de l'eissarpa e de còps que i a los gants.
Vaquí, es son que çò que voliái apondre sus Avairon.
Una pichòta parentèsi, aquela cançon es benlèu pas de la mai fina o de la mai devolopada mas trapi que lo 4P mòstra plan de qu'es Avairon, e se fasètz atencion veirètz que soi pas la sola a recomendar las fèstas de vilatges d'Avairon...

Un pauc de cultura... Mirèio

2008-09-28T21:03:00.007+02:00

Cante uno chato de Prouvènço.
Dins lis amour de sa jouvènço,

À travès de la Crau, vers la mar, dins li blad,

Umble escoulan dóu grand Oumèro,
Iéu la vole segui. Coume èro
Rèn qu'uno chato de la terro,
En foro de la Crau se n'es gaire parla.

Emai soun front noun lusiguèsse

Que de jouinesso; emai n'aguèsse
Ni diadèma d'or ni mantèu de Damas,
Vole qu'en glòri fugue aussado
Coume uno rèino, e caressado
Pèr nosto lengo mespresado,
Car cantan que pèr vautre, o pastre e gènt di mas!

Mirèio, Frederic MISTRAL.

Je chante une jeune fille de Provence.

Dans les amours de sa jeunesse,

A travers la Crau, vers la mer, dans les blés,

Humble écolier du grand Homère,

Je veux la suivre. Comme c'était

Seulement une fille de la glèbe,

En dehors de la Crau il s'en est peu parlé.

Bien que son front ne resplendît

Que de jeunesse; bien qu'elle n'eût

Ni diadème d'or ni manteau de Damas,

Je veux qu'en gloire elle soit élevée

Comme une reine, et caressée

Par notre langue méprisée,

Car nous ne chantons que pour vous, ô pâtres et habitants du mas!

Mireille, Frédéric MISTRAL.

Vaquí los primièrs verses de Mirèio. Un cap d'òbra de la literatura occitana que prestarai amb plaser a los que l'an pas legit, que comprenon o non l'occitan puèi que i a la version en francés.
Un jorn qualqu'un me diguèt: " Ahh mas se parla pas d'un Vincent dins aquel libre?"
A ma granda suspresa aprenguèri qu'aquela istòria d'amor entre dos jovents, Mirèio e Vincent, èra coneguda per mai d'unes, quitament pel capbord del Capitòli...
Los de Tolosa lo conèisson es forçat...
Sabètz... lo tipe que se met a te tirar dessús amb una arma imaginària, lo que parla tot sol del costat de la Daurada... eca. (pels quand una pichòta istòria sus aquel personatge, la vòli plan dins un comentari)
Vaquí aqueste! Lo tipe, totjorn dins son univèrs, li contèt l'istòria de Vincent e Mirèio, e qu'èra per aquò que s'apelava Vincent e sa sòrre Mirèia.
Alara istòria vertadièra o inventada pel tipe ne sabi res... Quand lo veiretz es a vos de li demandar...

L'avaironesa parla de son país

2008-09-22T16:45:00.003+02:00

Cresi ben qu'o avètz totes comprés veni d'Avairon. Òc, sabètz aquel despartament a costat d'Erau, de Gard, de Losèra, de Cantal, d'Òlt, de Tarn e Garona, e enfin de Tarn. Bon vos l'acòrdi es benlèu pas lo mai polit e agradiu, mas enfin a ieu me plai aqueste.
Vau pas jogar a la guida toristica, o faguèri sufisament fach pendent mai de dos meses aqueste estiu.
Qué seriá l'Avairon, e subretot lo sud Avairon, sens sas fèstas de vilatge? Òc, o vos demandi. Cresi que ieu me'n podriái pas passar.
Alara cossí vos explicar aquò, son de vilatges, mai o mens pichòts, qu'al moment d'una dimenjada dins l'estiu renaisson per aculhir los festejaires que venon d'en pertot mai que mai d'avaironeses, plan segur mas tanben d'erauteses, de tarneses... . Per los qu'an pas encara poscut anar a una d'aquelas fèstas, vos conselhi d'o far l'estiu que ven. Sètz sonque embarrassats per causir: Sant Africa, Vabres, Tornamira, Lapanosa, Murasson, Belmont... .
Vos vau tanben, un pauc parlar de Sant africa. Pichòta vila del sud Avairon, ont se pòt trobar sa polida glèisa, son pont vièlh e sa gara que veguèt pas de trin dempuèi un moment. I podètz tanben far un fum de causas lo ser.
Enfin una darrièra causa sus Sant Af ', lo 25 e 26 d'octòbre 2008 podretz assistir al 22e collòqui de la FLAREP : « Las lengas regionalas a l'escòla publica : passapòrt per una societat plurilingue», amb un concèrt de La Talvera e Mauresca Fracas Dub lo dissabte.

"Dam(!)giner" qu'es aquò??

2008-09-14T21:00:00.004+02:00

Per començar aqueste blòg, me cal tre la debuta explicar lo perqué del cossí d'aquela adreiça: http://damginer.blogspot.com. Si que non los curioses me van far cagar amb lors comentaris a la con...
Alara Dam(!)giner (sens "e" se vos plai) es un escais nom que rebali dempuèi qualques annadas ja!! E òc quand sèm doas Noemia cal plan trobar un quicòm per far la diferéncia... I aguèt mai d'unas tentativas mas es un professor que trobèt LO bon.
Los de Montpelhièr coneisson sonque la Noemia que s'aficha lo mens possible alara que del costat de Sant africa es la Dam(!)giner que pren plaça.
Pensi que dins aqueste blòg trobaretz mai de causas sus Damginer l'avaironesa que sus Noemia l'erautesa...

Benvengut e bona visita...